Bera Berak bihar 18:00etan Madriden partidu garrantzitsua jokatuko du Alcobendasen kontra, forma bikainean dagoen taldea, irabazten zaila izango dena. Hala ere, donostiarrak garaipena lortzeko intentzioarekin doaz, Leonen aurka sentsazioak berreskuratu ondoren. Dara Carvalho duda da.
Lehia honekin egutegiaren fase garrantzitsuenari hasiera ematen zaio, non Bera Berak Europara joateko bere aukera asko jokuan jarriko dituen. Bi partidu jokatuko ditu jarraian (hurrengoa azken sailkatuaren kontra) Alpeetan sartu baino lehen. Elda eta Itxako Donostiatik pasako dira, eta erdian Elx-era bisita benetan zaila. Fase horretara etxeko lanak eginda iristea komeni da, eta biharko garaipena negozia ezina da.
Horrela ulertzen du baita ere Reyes Karrerek “Goiko postuetan sendotzeko garaia iritsi da, edo bestela Europan sartzeko sufritu egingo dugu. Konpetentzia oso handia da, horregatik ezin dugu kalerik egin horrelako partiduetan. Bihar irabazi beharra dugu”.
Leonen kontra lortutako garaipen freskagarriaren ondoren, “irabaztea baino gehiago den partidu bat behar genuen” dio Karrerek, taldeak indarrak berreskuratu ditu Madridera joateko. Partidu honetarako Dara Carvalho brasildarra duda da. Norgehiagoka galdu lezake belauneko golpe batekin.
Aurrean Alcobendas, etxean Alicante gainditu duena, eta Elcheren aurka gol bakarragatik galdu duena. Madrildarrek hutsuneak dituzte, egia da, sailkapenean horregatik baitaude dauden lekuan, baina egun ona dutenean oso arriskutsuak dira. Gainera denboraldiko momenturik onenean daude, hiru partidu irabazi baitituzte jarraian.
Reyes Karrerek irudi ona du talde hontaz “gazteak eta freskoak dira. Etorkizun handiko jokalariak ditu, freskotasun handikoak, gauza handiak egiteko gai direnak. Oso maila interesgarria dute; hemen asko kostatu zitzaigun irabaztea. Partidu osoan zehar mantentzen dute intentsitatea nabarmenduko nuke”. Izen propiez hitz eginda, gogokoen duena da “Yvette Broch holandarra. Nere ustean ligako piboterik onenetakoa. Gainera, badituzte kalitatezko beste jokalari batzuk ere, Basic eta Marta Fernandez kasu”.
Laburbilduz, lehiakortasun handiko arerioa, gailentzeko zaila. Hala ere, duela sei egun Leonen aurka ikusi genuen Bera Bera hori, ia kantxa guztietan irabazteko gai da. Hori bai, maila hori mantendu beharko da puntuak Donostiara ekartzeko. Gure neskak horretarako gai dira.
Hurrengo asteburuan partidu pila izango dugu aurretik. Bera Beraren harrobiko talde guztiek norgehiagokak izango dituzte. Ea aurrera pausoak emateko gai diren bakoitza bere mailan.
Infantiletako B taldekoak izango dira goiztarrenak. Larunbatean 10:45etan Zarautzen Aiala A liderraren aurka arituko dira. Mahai gainean kolpea emateko aukera ezinhobea. A taldeak bestalde Usurbilen jokatuko du Udarregi 1en kontra. Aurkariek oraindik ez dute punturik batu, eta lidergora igotzeko aukera paregabea izan daiteke 12:30etatik aurrera izango dutena.
Larunbat arratsean iritsiko da kadete eta seniorren txanda. Gazteenek Bidebietan 16:00etan jokatuko dute euren multzoko liderraren aurka, Bide Onera Zuazo hain zuzen. Bera Bera irabazteko gai bada, sailkapenean aurrea hartuko lioke. Bi ordu beranduago, Bidebietako kantxara seniorrak irtengo dira. Aloña Mendi izango dute arerio, sailkapenean atzetik duten taldea. Irabazi ezkero, laugarren izatea gutxienez ziurtatua lukete donostiarrek.
Aste bukaerari agur esateko jubenilak arituko dira igandean 11:30etan Zarautzen. Bera Berak Aialari egingo dio bisita, lehen partiduan maila izugarria eman zuen taldea. Ea gure neskak emaitza on bat ekartzeko gai diren.
Aste bukaera honek Bera Berako taldeentzat era guztietako emaitzak ekarri ditu; garaipen bat, porrot bat eta berdinketa bat. Hori izan da harrobiko taldeek jokatutako partiduetan izandako balantzea.
Bera Bera B taldeak jokatzen duen Gipuzkoako Infantil Txapelketaren azken fasea gogorra izaten ari da. Donostiarrek partidu lehiatua jokatu zuten Ereintzaren aurka, eta borroka gogor baten ostean, puntu bat ekartzeko aukera izan zuten, 22ra berdindu ostean.
Kadeteek bestalde, bigarren faseko lehen garaipena lortu zuten, Usurbil 26 eta 31ko emaitzarekin gainditu ondoren. Emaitza honek autoestima indartzeko balioko dio Bera Berari, maila hau handia geratzen ez zaiela erakutsi baitute.
Bukatzeko, jubenilek burua makurtu behar izan zuten Autobuses Juantxu Kukullagaren kontra Donostian. Partidua oso lehiatua izan zen, eta gure neskek zerbait ona ateratzeko aukerak izan zituzten arren, azkenean puntuek Egiatik alde egin zuten 29-31 galduta.
10 egunez lehiatu gabe egon ondoren, Bera Berak bihar 19:00etan ABF Ligari ekingo dio berriro ere, Cleba Leonen kontra Bidebietan jokatuko duen partiduan. Lehiaketa erregularrean bi porrot jarraian jaso ondoren, eta amaitzeko bederatzi jardunaldi bakarrik falta direla kontuan hartuta, irabazteko beharra du taldeak arazoetan ez sartzeko.
Eldarekin aurpegia emanda Erreginaren Kopan galdu ostean, donostiarrek egun asko izan dituzte animikoki eta fisikoki errekuperatzeko. Partidurako Alba Menendez ezezik, beste guztiak prest egongo dira. Jokalariek gogo izugarria dute orain dauden tendentzia negatibo horretatik irtetzeko. Horretarako badakite Castro eta Murtziaren kontrako partiduetan egon ziren hutsuneak ezin direla errepikatu, oso garesti irtengo bailitzateke.
Kontzentrazio osoa eta defentsa indartsua beharko dituzte garaipenaren bidera itzultzeko. Ez gara erotu behar, taldea sailkapenean laugarren baitago, eta Bidebieta Castro ezik beste guztiek galdu dute. Sagunto, Alicante eta Elche bezalako talde indartsuak burumakur irten dire hemendik. Beraz, zelatuen babesean, gipuzkoarrak euren bertuteetan sinetsi behar dute, dakiten bezela aritzen badira garaipena lortuko baitute.
Donostiara azken zortzi puntuetatatik bost lortu dituen Cleba Leon dator, etxetik kanpo oso arriskutsua dena. Elcheri galde diezaiotela bestela, gol bakarragatik irabazi ziona. Lehen itzulian Bera Berak euren kantxan berdinketa lortu zuen soilik, horrebestez, azken norgehiagoketako maila hobetzen ez bada, leonekoek ez dute oparirik egingo.
Neguko merkatuan oso ondo indartu dira, Daria Ilina pibotearekin esaterako. Erasoan asko ematen dio taldeari, nahiz eta azkenaldian ezin izan duen jokatuko belauneko minagatik. Andre Mugosa Montenegroko laterala ere ekarri dute, Leoneko bere bigarren etapan maila ona ematen ari dena. Hala ere, izen propioez hitz eginda, Soraya aipatu behar, talde honetako pieza garrantzitsuenetakoa. Hala ere, postuz postu, Bera Berak kalitate gehiago dauka, eta ez dago aitzakiarik partidua irabazteko.
Bera Beraren harrobiko taldeek asteburu berri bati ekingo diote, eta pasa den asteko emaitza txarrei buelta ematen saiatuko dira. Infantilek eta seniorrek atsedena izango dute, baina infantiletako B taldeak partidu bat jokatzeko zuenez, larunbat honetan arituko da.
Txikiek fase berriaren estreinaldian gol bakarragatik galdu zuten, eta gauzak aldatzen saiatuko dira larunbatean 11:45etan Beraunen Ereintzaren kontra jokatuko duten partiduan.
Kadeteek eta jubenilek ere ez zuten ondo hasi fase zail eta berri hau. Bera Bera kadeteak Usurbili egingo dio bisita larunbatean 17:00etan. Amorruz joango dira, denboraldiko lehen norgehiagoka galdu ondoren.
Jubenilek beren aldetik etxean jokatuko dute, Egian konkretuki, Autobuses Juantxu Kukullaga arerio izanik. Lehia larunbatean 17:30an jokatuko da.
