super amara Bera Berak Caja Rural Aula Valladolidek baino gehiago asmatu du, eta horregatik lortu du garaipena gaur arratsaldean Huerta del Reyko pista zailean, hasieratik amaierara, erasoak defentsak baino gehiago izan baitira (36-40, 18-20). Amaierarako bost minuturen faltan etxekoak hurbildu egin dira (36-37), baina golik sartu gabe geratu dira gipuzkoarren garaipena erraztuz. Costa del Sol Malagak KH7 BM Granollersen aurka galdu ondoren bigarren postura jauzi egin duen donostiarren.
“Ez da astebeteko geldialdia izan, aste normala baizik, ondo zetorkiguna hurrengo hilabetea prestatzeko”, hasi du bere hitzaldia hedabideen aurrean Imanol Alvarezek, super amara Bera Berako entrenatzaileak. Hurrengo lau asteetan zazpi partida jokatuko ditu, Ligako lau eta European Leagueko hiru.
Zilarrezkoan, Bera Berak aurkari zail bati egingo dio bisita larunbatean, 18,30etan. Izan ere, Errotabarri Ermua izango du zain, egun bigarren sailkatua.
Bestetik, Lacturale Bera Bera kadete taldeak Diputazio txapelketari ekingo dio Artalekun. Gipuzkoako gainontzeko txapelketetan Bidebietan arituko dira senior mutilak, kadete mutilak eta jubenil neskak larunbat arratsaldean.
Bestetik, igande goizean infantilak Yoldin izango dute hitzordua eta txikienak Orion arituko dira.
Lacturale Bera Bera taldeko Oihana Murgiondo, egun Sierra Nevadan dagoena Espainiako Federazioak antolatutako konzentrazioan, otsailean Montenegron burutuko den Mediterraneoko txapelketan parte hartzeko deitu du Espainiako jubenil mailako selekzioak.
Cristina Cabezas hautatzailearen selekzioak Zipre, Eslovenia, Serbia, Errumania, Aljeria eta Grezia izango ditu aurkari Podgorikan otsailaren 17tik 21era bitartean. Jokalariak otsailaren 12an Bartzelonan daude deituta eta hurrengo egunean Belgradora abiatuko dira.
Topaketa honek Europako Txapelketari begira baliogarri da, izan ere, jubenil mailakoa uztailaren 30etik abuztuaren 10era bitartean ospatuko da Podgorikan bertan.
European Leagueko multzoen fasearen erdialdea igarota, bi garaipenekin, super amara Bera Berak final-laurdenetarako bidea urratu du aurreneko sailkapenean bigarren kokaturik. Hala ere, etxetik kanpo bi partida jokatu behar ditu orain (otsailaren 9an Norvegian eta otsailaren 16an Parisen), Gascan ligaxka itxi aurretik (otsailaren 23an), HGS Bensheim/Auerbach Flames liderraren aurka.
